Sapin

 
Isuot mo ang tsinelas ng
    taong nagmamartsa sa daan
    na may hawak na "NO TO TFI" banner o nagwawagayway
    ng bandilang pula
    na sumisigaw, damdami'y masiklab
    at pinaglalaban iyong karapatan.

Isuot mo ang sapatos ng
    taong nanonood ng mga nagmamartsa sa daan
    na may credit card o maraming pera sa bulsa
    nakikipagkwentuhan, nangungutya
    pero di n'ya alam kanyang karapatan.

Isuot mo ang alikabok ng
    taong naglalakad ng nakatapak sa lupa at daan
    tulak ang kariton, bitbit ang anak na gutom
    lumilimos, nakikiusap
    para maibigay sa anak ang karapatang mabuhay.

Isuot mong muli ang iyo...
    alin ba sa tatlo?
    O kabilang ka sa mas higit na mapanghamak o laging talo?
    Alam mo na ba ang daang tinatahak, at kung saan ba patungo?
    Suot ang sapin sa paa na napili mo.
spread the love